There is no video clip yet

Minisita mu Bwakabaka bwa Buganda Oweekitiibwa David Kyewalabye Male (wakati) akubirizza abantu okujjumbira amagezi ag'ekikugu kubanga ge gajja okutuusa eggwanga ku nkulaakulana eya nnamaddala. Yabadde aggulawo omusomo ku kugunja ebigambo by'amagezi ag'ekikugu ogwategekeddwa akakiiko ka Luganda/ Lusoga/ Lugwere ku Bulange e Mengo. Mu musomo guno akakiiko mwe kaayanjulidde ebigambo by'amagezi ag'ekikugu bye kaanoonyerezzaako era bye kawandiiseemu ekitabo kye kagenda okufulumiza ku mutimbagano. Kaminsona w'ebyenjigiriza ebisookerwako, Dr. Tony Mukasa Lusambu (ku kkono) naye yalambuludde obukulu bw'ennimi ennansi mu byenjigiriza ebisookerwako ne yeeyama ku lwa minisitule y'ebyenjigiriza okugenda mu maaso n'okutandisa abayizi okusoma nga basomesebwa mu nnimi zaabwe ennansi. Omwogezi w'olunaku, Dr Mathias Mulumba Bwanika (ku ddyo) yasomesezza ku bukulu bw'okugunja ebigambo by'amagezi ag'ekikugu n'ategeeza nti ke kamu ku bubonero obulaga okusuumuusibwa kw'endowooza z'abantu.

AKAKIIKO KANJULIDDE BANNANNIMI EBIGAMBO BY'AMAGEZI G'EKIKUGU

AKAKIIKO ka Luganda/Lusoga/Lugwere kanjulidde bannannimi n'abakugu abatali bamu ebigambo by'obujjanjabi, obuzimbi, obwamakanika n'obuweesi bye kaanoonyerezzaako, bibeere omubumbirano abakugu kwe basinziira okugunja ebigambo by'amagezi g'ekikugu ebirala ebitannafunika mu lulimi Oluganda. Bino byabadde mu musomo ku kugunja ebigambo ogwategekeddwa akakiiko kano mu kaweefube w'okwagazisa abantu ssaayansi n'amagezi ag'ekikugu amalala batandike okugafumiitirizaako era n'okugayiyiizaamu ebintu ebizimba eggwanga.

Omosomo guno ogwakubiriziddwa omusomessa ku yunivasite ya Uganda Martyrs, Mw. Andrew Kirabira,  gwagguddwaawo Minisita w'olulimi, ennono, ebyobuwangwa n'ebyokwerinda e Mengo Oweekitiibwa Kyewalabye Male olwo omwogezi omukulu okuva ku yunivasite e Makerere, Dr. Mulumba Bwanika n'asomesa ku bukulu bw'okugunja ebigambo by'amagezi ag'ekikugu, emitendera egiyitibwamu mu lulimi Oluganda okugunja ebigambo n'akasengejja mw'obiyisa okupima oba ddala bisaanidde.

Oluvannyuma abeetabye mu musomo beeyawuddemu mu bibinja ne baweebwa ebigambo bino eby'amagezi g'ekikugu babikubagenyeeko ebirowoozo. Bwe binaamala okutereezebwa, n'okuyingizaamu ebyavudde mu kukubaganya ebirowoozo kuno, ebigambo bino bigenda kukolebwamu ekitabo kifulumire ku mutimbagano guno. Abeetabye mu musomo guno kwabaddeko abayizi okuva mu yunivasite e Makerere, bannakibiina ky'Olulimi Oluganda, abasomesa. bannaddiini bannamawulire n'abakgu mu mirimu egitali gimu.

Laba ebifaananyi by'abamu ku beetabye mu musomo guno wansi (Ebifaananyi byonna bya Vivien Nakitende)

Muky. Geraldine Bukenya eyamala ebbanga eriwera mu kitongole ekiteekateeka ebisomesebwa mu masomero (National Curriculum Development Centre) nga kati yawummula bwe yabadde akubaganya ebirowoozo ku bigambo by'amagezi ag'ekikugu ebyayanjuddwa akakiiko ka Luganda/ Lusoga/ Lugwere.

EBIGAMBO EBY'AMAGEZI OKUVA MU MUSOMO

MINISITA DAVID KYEWALABYE MALE:  Tulina okunyweza obuwangwa bwaffe  kubanga tosobola kuzimba ggwanga,  nga tosoose kunyweza lulimi luzaaliranwa. Eky’obutanyweza nnimi zaffe nzaaliranwa,  kibadde kizibu kinene mu byenjigiriza ng’abayizi tebategeera bulungi bibasomesebwa, ne kivaako okukwata obukusu okusobola okuyita ebibuuzo.

Obuzibu buli nti abantu bwe boogera ku lulimi oluzaaliranwa,  bangi balowooza nti bategeeza Luganda lwokka ekintu ekikyamu, kitegeeza buli lulimi lwa muntu mu ggwanga lye gy’azaalwa.

Omuntu ayagala  okukusaanyawo, asooka kusaanyawo lulimi lwo, tusaanye okunywerera ku nnimi zaffe, abasomesa  okubonereza abayizi aboogera ennimi  ennansi ku masomero kikyamu, kuba kizibakyaya ate nga ly’ekkubo lye tutunuulidde okuyigiriza n’okutumbula eggwanga lyaffe. Teri nsi eyinza kukulaakulana nga tekozesa nnimi zaayo nzaaliranwa,  n’ezo ze twegomba ezaakulaakulana edda zikozesa  nnimi zaazo, kale nsaba omumuli gwe mukoleezezza temuguzikiza tuzimbe olulimi lwaffe n’eggwanga lyaffe.

 


 

 

DR TONY MUKASA LUSAMBU, kaminsona w’ebyenjigiriza ebisookerwako mu ggwanga:  Ffe mu  gavumenti eya wakati ensonga y’ennimi ennansi  twagizuula nga nkulu , tulemeddeko nti abayizi bonna okuva mu nassale okutuuka ekibiina ekyokusatu balina kusoma mu nnimi zaabwe ennansi. Bukya  nkola eno etandika ebyenjigiriza byaffe bikyuse kinene, abaana bakola bulungi.

Eggwanga lirina obuzibu, teririna lulimi lwa ggwanga, tukyali  ku nnimi ngwira, ssinga tukuza ennimi zaffe ennansi ne zoogerebwa nnyo kuno n’ebweru w’eggwanga  kijja kuba kyangu okulondako olulimi lw’eggwnaga oluba lukozesebwa.

 


 

 

 Mathias Mulumba Bwanika (Associate Proffessor), musomesa mu  ttendekero ly’abasomesa mu yunivasite  e Makerere:

Okugunja kwe kuteekawo ekintu ekitabaddeewo, ebigambo bya ssaayansi ne tekinologiya ebisinga tugenda kubigunja kuba bingi tubadde tetubirina ate tubiyingize mu ebyo ebibaddewo.

Obwetaavu bw’okugunjaawo ebigambo bulaga nkulaakulana y’abantu mu ntegeera yaabwe.

Eggwanga  gye lyolekedde lyetaaga abantu abayiiya abasobola okutondawo emirimu naddala nga beeyambisa tekinologiya, obuyiiya buno tetusobola kubuggyayo nga tukozesa nnimi ngwira.

Twagala tukozese ebigambo bino tukongojje amasomo ga ssaayansi ne tekinologiya abaana baffe bagategeere bulungi basobole okuggyayo obuyiiya bwabwe.

 


 

 

Margaret Nankinga , Omukwanaganya w’akakiiko ka Luganda/ Lusoga/ Lugwere: Tulina ebintu bibiri bye twetaaga okutegeera obulungi tuleme kuwaba. Waliwo ennimi ezikusobozesa okwogerezaganya n’abantu abawerako (Languages of wider communication) ne wabaawo n’ennimi ezisumulula obuyiiya n’obusobozi bwaffe (unlocking potential). Eggwanga okutuuka ku nkulaakulana eya nnamaddala, abantu baffe beetaaga okusooka okutaggulula, okusumulula obusobozi bwabwe n’obuyiiya nga bayita mu nnimi zaabwe enzaaliranwa ze basinga okutegeera era mwe basobola okuyiiyiza olwo bwe banaamala okuyiiya ebikulaakulanya eggwanga babitunde ebweru w’eggwanga nga bakozesa ennimi ezibasobozesa okwogerezaganya n’abantu abawerako. Ennimi zaffe enzaaliranwa zitaggulula era zisumulula obuyiiya ate ennimi endala nga Oluswayiri, Olungereza, Olufalansa n’endala ne zikosobozesa okwogerezaganya n’abantu abawerako


 

Fred Lukabwe, Ssentebe w’Ekibiina ky’Olulimi Oluganda : Olulimi lwonna okukulaakulana  luteekwa  okufuna ebigambo ebinnyonnyola ebintu  ebipya, okuwandiika n’okunoonyereza, ne tuvaayo n’ebigambo ebinnyonyola obulungi ssaayansi ne tekinologiya, tulaba nga ly’ekkubo ettuufu okukulaakulanya eggwanga lyaffe kuba kijja kuggyayo obuyiiya bw’abantu baffe nga bategedde bulungi amagezi ag’ekikugu gano.


 

Abamu ku beetabye mu musomo gw'okugunja ebigambo by'amagezi ag'ekikugu mu Luganda ogwabadde ku Bulange ku Lwokuna nga Ddeesemba (Ntenvu) 5, 2019.

Akulira akikko Margaret Nankinga ng'ayogera mu lukung'aana mu Washington DC. Ekifaananyi kituweereddwa Results For Development. Ebifaananyi ebirala bisange ku:
https://drive.google.com/drive/u/0/folders/1r0MFwlkNDTzoqlfBu70y-O6wncZ_q6Cw

Mar. 30, 2019

KAWEEFUBE W'OKUMALAWO OBUTAMANYA KUSOMA NA KUWANDIIKA AKAKIIKO KAMUTUTTE MU AMERIKA

Akakiiko ka Luganda/ Lusoga/ Lugwere Vehicular Cross-border Language Commission kataddewo enkolagana n’ebibiina mu nsi yonna ebitakabana okumalawo obutamanya kusoma na kuwandiika mu bantu naddala mu baana.
Enkolagana eno yatongozeddwa mu lukung'aana olwamaze ennaku ebbiri 28 ne 29 March 2019, mu Washington DC mu Amerika nga lwatuumiddwa ‘Literacy Partners Summit’ olwategekeddwa era ne lutuula ku kitebe ky’ekibiina kya Results For Development (R4D) abaawomye omutwe mu nkolagana eno.
Ebibiina ebiri mu nkolagana eno bimaze emyezi 11 nga bitegeka ebintu eby’enjawulo ebineeyambisibwa mu kaweefube w’okumalawo obutamanya kusoma na kuwandiika nga mu bino mulimu enkola eyinza okukozesebwa okusikiriza n’okuyamba abazadde okufaayo, okulondoola n’okwagazisa abaana okuyiga okusoma n’okuwandiika nga batandikira awaka, bagende okutuuka okugenda ku masomero nga baliko we batuuse.
Ebirala mulimu enkola eneeyamba ebibiina bino okumanyisa abantu abatali bamu bye bikola, enkola eyamba abasomesa okwekenneenya bye beeyambisa okusomesa abaana okuyiga okusoma n’okuwang'ana amagezi, enkola eneeyamba okuyingiza tekinologiya mu kuyigiriza okusoma n’okuwandiika n’ebirala.
Akulira akakiiko ka Luganda/ Lusoga/Lugwere Margaret Nankinga bwe yabadde ayogera mu lukungaana luno mu Washington DC, yalaze obukulu bw’okutandikawo mu masomero ebibiina abayizi mwe beegattira ne basoma ebitabo ebibanyumira era ne bavuganya ne mu kuwandiika obugero n’obuboozi obuyiiye nga bali mu bibiina bino ebimanyiddwa nga ‘readers/ writers’ clubs. Nankinga yagambye nti kino kyakunyweza okuyiga okusoma naddala mu nnimi ennansi ezeeyambisibwa mu kusomesa okuva mu P.1 okutuuka mu P.3 olwo ne bwe bagenda mu bibiina ebirala nga ne basigala nga bakaza okuzisoma n’okuziwandiika nga bayita mu bibiina bino. Ebibiina tebikoma ku kuyamba kunyweza n’okukaza ennimi ennansi naye era biyambako mu kuyiga Olungereza abaana lwe baba bakozesa mu kusoma.
Nankinga yategeezezza abaabaddewo obukulu bw’ennimi ennansi mu kuyigiriza okusoma n’okuwandiika bwe yabagambye nti abaana bakaluubirirwa nnyo bwe batandika okuyiga okusoma mu nnimi ze batamanyi era ze batakozesa waka. Abantu 100 okuva mu bibiina 20 eby’enjawulo be bali mu kaweefube ono era olukung'aana luno olwabadde mu Washington DC lwetabiddwaamu ebibiina eby’enjawulo ebyegasse mu nkolagana eno, okwabadde abategesi Results For Development, Beyond The Classroom, World Reader, Oneness Family Montessori school, Aga Khan University, Open Learning Exchange Ghana, USAID, World Vision, ReadABookNigeria Initiative, Cell-ED, Literacy4All n’ebibiina ebirala.
Abeetabye mu lukung'aana baayanjudde enkola ez’enjawulo ze babadde bakolako okumala emyezi 11 era ne beeyama bwe bagenda okwegatta mu nkola y’okuzimanyisa abantu n’okuzibunyisa zibe nga zikozesebwa okumalawo obutamanya kusoma na kuwandiika.
Leero mu nsi yonna, abantu abakulu obukadde 750 tebamanyi kusoma na kuwandiika ate ng’ekiruubirirwa ky’Amawanga Amagatte eky’okussaawo enkulaakulana eya nnamaddala omwaka 2030 we gunaatuukira eruubirira okulaba ng’abavubuka n’abantu abakulu abawerako bafuna obumanyi obwetaagisa mu kusoma n’okuwandiika awamu n’okubala.
Ebyayogeddwa bisange ku:
https://drive.google.com/drive/u/0/folders/13M26Qyc_vkfYfN10HeoC9lFHlI0qZ_UZ

Omuwandiisi w'akakkiko, Ssaalongo Andrew Kaggwa ng'asomera abeetabye mu musomo lipoota y'akakiiko ka Luganda/ Lusoga/Lugwere ku mpandiika y'Oluganda.

Mw. Bakaye Lubega, avunaanyizibwa ku byobuwangwa mu mukago gw'obuvanjuba bwa Afirika (EAC) naye omusomo yagwetabyemu.

Pulezidenti w'akakiiko, Muky. Margaret Nankinga ng'ayogera eri abeetabye mu musomo.

Polofeesa Mukash Kalel okuva DRC ng'aliko by'annyonnyola.

Munnakakiiko Muky. Peggy Namakula ng'alaga Polofeesa Kiango okuva e Tanzania akamu ku butabo bwe yawandiika.

Akakiiko kalaze ebintu17 ebyetaaga okugobererwa mu mpandiika y'Oluganda

Akakiiko ka Luganda/ Lusoga/ Lugwere kalaze ebintu ebikulu 17 ebyetaaga okugobererwa mu mpandiika  y’olulimi Oluganda. Bino bibadde mu musomo ogukwata ku mpandiika y’ennimi za Afirika ttaano ogwategekeddwa akakiiko ka African Union ak’ennimi akayitibwa African Academy of Languages (ACALAN).  Akakiiko kaalaze nti okuva empandiika y’Oluganda entongole bwe yakkaanyizibwako mu mwaka gwa 1947, kati gy’emyaka 71, ebintu bingi ebizze  biyingizibwa mu mpandiika y’Oluganda ng’ebimu biva mu bigambo ebigenda biyingizibwa mu lulimi olw’amagezi ag’ekikugu agayingizibwa mu bulamu bw’omuntu n’ebirala nga biva ku bayigirize abamu abalowooza nti empandiika entongole yandibaddemu ebikyusibwamu.

Mu musomo ogwategekeddwa ACALAN ku kukkaanya ku mpandiika y'ennimi; Oluganda, Kiswahili, Kinyarwanda/Kirundi, Malagasy ne Somali, bannakakiiko ka Luganda/ Lusoga/ Lugwere nga beegwattiddwaako Mw. Bakaye Lubega ow’ebyobuwangwa mu mukago gw’amawanga g’obuvanjuba bwa Afirika ne Muky. Ruth Muguta okuva mu Minisitule y’Ekikula ky’abantu, eyabadde omutunuulizi. Baavuddeyo n’ebintu ebikulu 17 ebirina okugobererwa mu mpandiika y’Oluganda entongole.

Ku lw’akakiiko, omuwandiisi waako Ssaalongo Andrew Kaggwa yategeezezza abeetabye mu musomo guno nti nga tuleeta enkyukakyuka mu mpandiika y’ennimi tulina okwegendereza obutazza nnimi zino mabega mu biwandiike bye zirina ne mu muweondo gw’abantu abasobola okuzisoma n’okuziwandiika kubanga enkyukakyuka ezimu zifuula ebiwanddike ebyawandiikibwa edda okuba nti tebikyakola n’eyali asobola okusoma olulimi olwo ate n’alemwa okulusoma.

Mu bintu 17 akakiiko bye kanokoddeyo mulimu ensengeka y’ennukuta za walifu, empandiika y’ennukuta ebbiri ezifaanagana n’ezitafaanagana, okulaga enzika n’ennyambuka y’amaloboozi, empandiika y’ebigambo ebiggyiddwa mu nnimi endala n’ebirala ntoko.

Lipoota ku bintu bino 17 yaweereddwa abakulu mu ACALAN nga n’oluvannyuma akakiiko kagenda kuyita abakugu b’Olulimi Oluganda babyogereko nga tebinnabunyisibwa mu bakozesa olulimi luno bonna. Ebyatuukiddwaako byesigamiziddwa ku mpandiika y’Oluganda entongole eya 1947.

AU etaddewo wiiki y'ennimi za Afirika

Ng’afundikira omusomo guno ogwamaze ennaku essatu ku wooteeri ya Speke Resort e Munyonyo, Ssaabawandiisi wa ACALAN, Dr. Dampha Fafa Lang yagambye nti ennimi za Afirika zeetaaga okugunja ebigambo by’amagezi ag’ekikugu aga ssaayansi ne tekinologiya, Abafirika basobole okugakozesa okweggya mu bwavu. Yagambye nti omukago gw’amawanga ga Afirika (AU) gutaddewo wiiki okuva nga January 24- 31 okuba wiiki y’ennimi za Afirika nga yaakweyambisibwa okunyweza ebyakkaanyizibwako African Union okutumbula ennimi za Afirika n’ebyobuwangwa.

 

Bannakakiiko ka Luganda/Lusoga/Lugwere nga bakubaganya ebirowoozo ku mpandiika y'olulimi Oluganda bwe baabadde mu musomo gw'empandiika y'ennimi ennansi e Munyonyo

Bannakakiiko k'olulimi oluyitibwa Malagasy okuva mu Madagascar bwe baabadde bawummuddemu

Bannakakiiko ka Kiswahili nga bakubaganya ebirowoozo ku mpandiika y'olulimi luno bwe baabadde mu musomo gw'empandiika y'ennimi ennansi e Munyonyo

Abeetabye mu musomo gw'ennimi ennansi nga bali ne Minisita w'eggwanga ow'ekikula ky'abantu, Muky. Peace Regis Mutuuzo

Dr. Babajide Ojo okuva ku kitebe kya ACALAN ng'awayaamu ne Muky. Pamela Batenga, munnakakiiko ka Luganda/Lusoga?Lugwere. Ku ddyo ye Muky. Florence Nabachwa.

Minisita w'Eggwanga ow'Ekikula ky'abantu, Muky. Peace Regis Mutuuzo ngalamusa ku Polofeesa Baye Mekonnen okuva mu Ethiopia

Minisita alangiridde ennimi 4 ezigenda okukulaakulanyizibwa nga ennimi z'eggwanga mu Uganda

Minisita w'eggwanga o'wEkikula ky'abantu, Muky. Peace Mutuuzo alangiridde ennimi nnya Uganda z'egenda okukulaakulanya zibe ennimi z'eggwanga (National languages). Ennimi z'alangiridde kuliko Oluganda, Runyakitara, Luo, ne Kiswahili. Bino Minisita abirangiridde bw'abadde aggulawo omusomo ogukwata ku mpandiika y'ennimi ennansi ttaano omuli Oluganda, Olusomaali, Kinyarwanda/Kirundi, Malagasy ne Kiswahili.

Minisita ategeezezza wadde nga twagala enkolagana ennungi n'abantu abalala naye ate tetuyinza kwebalama kukkiriza kye tuli. Yategeezezza nti ebyobuwangwa bwe buwonero bwa Afirika. Yagambye kyennyamiza okukulaakulanya ennimi z'abalala ne tusuulirira ezaffe. Yategeezezza nti tulina amawanga 65 mu Uganda n'ennimi ez'enjawulo naye eggwanga lisazeewo likulaakulanye ennimi nnya okusooka n'endala zigoberere. Yagambye nti ennimi endala nnyingi eziyingira mu nnimi zino ennya ezaalondeddwa. Yalaze obwetaavu bw'okukola etteeka erifuga ennimi (National Language Policy) ng'ekyetaagisa z'ensimbi okukola kino.

Yagambye nti alina essuubi nti Afirika erituuka n'esalawo okukozesa olulimi lumu. 

Minisita yayaniriziddwa akulira akakiiko k'ebyennimi aka African Union akayitibwa African Academy Of Languages (ACALAN), Dr. Dampha Fafa Lang amutegeezezza obukulu bw'okutumbula ennimi za Afirika ennansi kubanga Afirika teyinza kukulaakulana okuggyako ng'eyita mu nnimi zaayo. Yategeezezza nti ennimi zino okukola omulimu guno obulungi zeetaaga okuzimba ebigambo by'amagezi ag'ekikugu aga ssaayansi tekinologiya namalala.

Eyakiikiridde omukago gw'amawanga g'obuvanjuba bwa Afirika, Mw. Bakaye Lubega yayogedde ku bukulu bw'olulimi Oluswayiri nga olulimi olugatta omukago gw'obuvanjuba bwa Afirika n'asaba Gavumenti mu kitundu kino zifube okulukulaakulanya wamu n'ennimi endala ennansi nga Oluganda olw'okutumbula enkulaakulana mu kitundu.

Ye akulira akakiiko ak'ebyekikugu mu ACALAN aka Assembly of Academicians, Polofeesa Sammy Chumbow yategeezezza nti okukkaanya ku mpandiika y'ennimi ekigendererwa kuwa nnimi zino busobozi zibe nga zisobola okukozesebwa mu byenkulaakulana ate n'okwongera okukendeeza enjawukana mu by'ennimi zibe nga zikozesebwa okugatta abantu mu Afirika.

Omusomo guno ogw'okumala ennaku essatu guli ku Speke Resort Munyonyo. Gwakuggalwawo ku Lwomukaaga.

 

 

 

LEARNING LUGANDA FOR ENGLISH AND KISWAHILI SPEAKERS

Luganda - English- Kiswahili Lexicon

BANNAKAKIIKO k'ebyekikugu aka ACALAN bali mu Addis Ababa okuteesa ku nkulaakulana y'ennimi ennansi eza Afrika. Oluteesa lwagguddwaawo Kaminsona w'ekitongole ky'embeera z'abantu mu African Union, Oweekitiibwa Amira El Fadir eyakiikiriddwa omubaka Olawale Majyegun. Kaminsona yakubirizza Abafirika okussa ku mwanjo ennimi zaabwe kubanga mwe bajja okuyita okuleetawo enkulaakulana ey'omuggundu mu Afrika. "Tuteekwa okukozesa ennimi zaffe okutondawo emirimu n'okuleeta enkulaakulana mu Afrika", bwe yagambye. Omuganyulo oguli mu lulimi gutondebwawo butondebwa era okuggyako kino nga kikolebwa tewali mateeka ganaayisibwa gajja kuwa bukakafu bwa nkomeredde nti zijja kukozesebwa.

Yawadde obweyamu  ku lw'ekitongole ky'akulembera nga bwe kigenda okukola kyonna okuwagira ACALAN mu kaweefube w'okukulaakulanya ennimi za Afrika.

Oluvannyuma abantu abatali bamu okuva mu mawanga ga Afrika ag'enjawulo baayogedde kyokka nga bonna balina bye bafaananya omuli eky'okuba nti amawanga mangi mu Afrika tegalina nkola za ssimba ezassibwawo, okwesigamizibwa enkozesa y'ennimi (National language policy), buli lukya Abafirika abakozesa ennimi zaabwe ennansi beeyongera kukendeera, obwetaavu bw'ebiwandiike naddala ebyo ebikozesebwa mu masomero ebiri mu nnimi ennansi bweyongera ate  ng'ebbula ly'ensimbi n'abantu abalina obusobozi okukulaakulanya ennimi zino nalyo ddene. Olutuula luno olwakubiriziddwa Pulof. Sammy Beban Chumbow okuva e Cameroon lufundikira nkya olwo waddewo olulala olw'akakiiko akafuzi aka ACALAN nalwo olujja okumala ennaku ebbiri. 

AGAAKAGWAWO

Feb. 21, 2017

Uganda ekuzizza olunaku lw'ennimi ennansi

Abazadde basabiddwa okuyigiriza abaana ennimi zaabwe enzaaliranwa, bagende okutuuka okutandika okusoma nga bawezezza waakiri ebigambo 500 bye bamanyi mu nnimi zaabwe kubanga bino bye bagenda okweyambisa mu kuyiga. Amagezi gano gaabaweereddwa amyuka kaminsona w'ebyenjigiriza Dr Tonny Lusambu ku mikolo gy'okukuza olunaku lw'ennimi ennansi ku Lwokubiri nga 21 February 2017.
Emikolo gino gyagguddwaawo minisita ow'ebyenjigiriza ebisookerwako, Muky. Rosemary Sseninde n'akubiriza abazadde n'abasomesa okunnyikiza ennimi enzaaliranwa kubanga gwe musingi abaana mwe batandikira okuyiga.
Emikolo gino egyabadde ku National Theatre gyetabiddwaako ne Minisita owa guno na guli Hajji Abdul Nadduli eyategeezezza nti Katonda yatutonda n'ennimi ez'enjawulo kubanga yali akimanyi bulungi nti y'entandikwa y'okumanya, era n'ategeeza nti omwana bw'ayiga olulimi lwe oluzaaliranwa kimuyamba okutegeera obulungi ebintu ebirala bingi mu nsi.
Emikolo gyaggaddwaawo Minisita avunaanyizibwa ku byobuwangwa mu Minisitule y'Ekikula ky'abantu, abakozi n'okutumbula embeera z'abantu, Mukyala Peace Mutuuzo naye n'anyweza obukulu bw'ennimi ennansi era n'akuutira abasomesa obutabonereza baana olw'okwogera ennimi zaabwe. Emikolo gyabadde gitambulira ku mulamwa ogugamba nti: Okutumbula okukozesa ennimi enzaaliranwa mu byenjigiriza olw'enkulaakulana y'eggwanga". (Laba ebirala ku muko gw'emikolo gyaffe).

June 25, 2015

AKAKIIKO KAGGUDDEWO EBIBIINA BY'ABASOMI B'EBITABO MU MASOMERO ABIRI E JINJA